“Diaspora sot përbën potencial shumëfish më të madh, jo vetëm financiar, por edhe profesional”

Valon Murati

Ministri

VALON MURATI

Ministër i Diasporës

Biografia e ministrit të Diasporës, z. Valon Murati

Valon Murati lindi në Prishtinë, në vitin 1975. Diplomoi në Fakultetin Ekonomik të Universitetit të Prishtinës, ndërsa studimet postdiplomike i përfundoi në Universitetin e Sarajevës dhe në atë të Bolonjës, në fushën e demokracisë dhe të drejtave të njeriut në Evropën Juglindore. Që nga viti 1993 ka qenë i angazhuar në aktivitetin politik në kuadër të ilegales, si anëtar LKÇK-së, duke qenë edhe kryetar i saj në vitin 1999. Që nga fillimi i vitit 1998 ka qenë aktiv në strukturat e Ushtrisë Çlirimtare te Kosovës. Ndërkaq, nga viti 2007 është aktiv në Lëvizjen për Bashkim. Tash për tash është Kryetar i Lëvizjes për Bashkim (LB-së).
Me eksperiencë të madhe në fushën e të drejtave të njeriut, e ka drejtuar Qendrën për të Drejtat e Njeriut në Universitetin e Prishtinës për 9 vjet, ndërsa deri tash e ka ligjëruar lëndën Mbrojtja Ndërkombëtare e të Drejtave të Njeriut dhe e Drejta Qytetare në kolegjin universitar “AAB”. Po ashtu, ka qenë anëtar i bordit dhe i këshillave drejtues të shumë organizatave, si “Forumi 2015”, Klubi për Politikë të Jashtme, Instituti i Sociologjisë në Tiranë, etj.
Në vitin 2000 i ka vizituar SHBA-të, në kuadër të “International Visitor Leadership Program” të Departamentit të Shtetit të SHBA-ve. Gjithashtu, ka marrë pjesë në shumë konferenca, seminare dhe projekte të organizuara nga organizata të ndryshme ndërkombëtare dhe rajonale.
Deri tani i ka të publikuar dhjetëra artikuj shkencorë dhe gazetaresk në konferenca dhe revista të shumta shkencore, si në botë, ashtu edhe në rajon.
I flet rrjedhshëm gjuhën angleze dhe atë serbo-kroate.
Është emëruar Ministër i Diasporës në seancën e Kuvendit të Kosovës të Republikës së Kosovës, e mbajtur më 8 dhjetor 2014.
Ministri Murati është i martuar dhe ka dy fëmijë.